O sábado 16 de maio ás 18 h no Seminario de Lugo celébrase a Convención de editores e colaboradores de LVCENSIA, para celebrar os primeiros 25 anos de publicación ininterrumpida da Revista. Durante estas dúas décadas e media suman máis de douscentos os colaboradores, que están invitados a este acto.
A estes e á prensa obsequiaráselles co número 50. Ademais dun traballo de Óscar González Murado, incorpóranse índices sistemáticos de autores e materias do publicado nos 49 números anteriores. Inclúen referencias cruzadas e son froito dun laborioso traballo.
15 de maio, Día do Mundo Rural
Os segrares, crecendo como persoas e como cristiáns, deben ir tomando responsabilidades nas comunidades rurais, en moitas das tarefas eclesiais que poden facer: a organización, o coidado e preparación do templo para as celebracións, a organización de procesións, de romarías, ou de novenas, impartir catequese a nenos e aos seus pais, preparación de cursos de formación, celebracións da palabra, etc. Exercendo estas responsabilidades fai que o fiel se considere máis partícipe da Igrexa e a considere súa.
Doutra banda, o feito de que xente con inquietude relixiosa se reúna para a preparación e a celebración de festexos populares, romarías, procesións… é unha oportunidade de chegar a ela por medio dunha esmerada reflexión en torno ao que se está organizando.
As confrarías e as asociacións próximas ás parroquias e a determinados santos e virxes son grupos que están máis sensibilizados para madurar no seu ser cristián. Poden estar accesibles a ir crecendo como cristiáns, a iniciar un camiño de formación na fe. Desde aí tamén xorden compromisos de participación na nosa Igrexa, sen necesidade de que o sacerdote estea permanentemente presente en todas as actividades de evanxelización.
O feito de ser menos persoas que nas cidades (tan despersonalizantes), de coñecerse todos, leva a ser máis humanos, máis próximos uns a outros, a ter máis empatía cos demais, e xa que logo a gozar cos gozos dos demais e a sufrir coa súa dor.
Facilita acudir a ver ás persoas soas, que necesitan coidados puntuais, que están enfermas de soidade. A Igrexa-pobo de Deus non é igual na cidade que nos pobos. Nestes a relación é máis humana, máis sinxela, máis próxima, acompáñase na soidade, nos funerais, nas perdas, no sufrimento. É máis doado acoller o proxecto de home-sociedade-Igrexa que Xesús quere.
Oración polos cristiáns perseguidos
Durante a semana que vai desde o día da Ascensión do Señor ata Pentecoste, dunha forma máis especial, a Igrexa de Lugo xunto co resto da Igrexa española unirase en oración polos cristiáns que están sendo perseguidos pola súa fe en calquera parte do mundo.
Festividade de San Pascual Bailón
O sábado 16 de maio hai unha Eucaristía, con rezo de vésperas, que se celebrará ás 18,30 horas no Altar do Bo Xesús da Catedral para honrar a San Pascual Bailón, patrón das seguintes asociacións eucarísticas: Adoración Nocturna, Confraría do Santísimo Santísimo, A.R.P.U., Apostolado da Oración e Marías dos Sagrarios. Todos xuntos e os que se queiran unir rogarán a mediación do patrón para a boa marcha de todas e cada unha das mencionadas asociacións, e para que non se arrefríe nunca o fervor eucarístico na “Cidade do Sacramento”, senón que máis ben aumente o número de devotos da mesma.
Asemblea Diocesana de Catequistas
A Delegación Diocesana de Catequese invita a participar na xa tradicional Asemblea de catequistas que este ano se celebra o día 16 de maio no Seminario. Será un día para compartir e formarse, co seguinte programa:
-
10.45h Acollida
-
11.00h Oración e presentación
Aplicacións á catequese a partir da Exhortación Evangelii Gaudium
-
12.00h Diálogo sobre o tema
-
12.30h Descanso
-
13.00h Eucaristía
-
14.00h Comida
-
15.30h Proxección audiovisual
-
17.00h Despedida e envío.